الرشوة أو الواسطة

بسم الله الرحمن الرحيم

واللهي بصراحه ماعارف من وين بدي ابدأ بهل موضوع...

الدين بقلك ماتمشي بطريق الحرام

وولاد الحرام مابتمشيك غير بطربوش مايعني بخمسمية ليرة وبما يعني الرشوة

وانت مضطر ومتاكد ماراح تمشي لا انت ولا وراقك ولا اي شي بدك ياه بدون رشوه

وهي الخمسميه ليرة اقل مثال ذكرتو...

لانو الرشوة ارتفعت كمان مع الازمة المالية

كل شي عم يغلااااا وحتى الرشوة...!

هاد غير الرشاوي والواسطات اللي ببلدنا...

وهاد غير الواسطات اللي بتوظف ناس

وبتترك ناس بدون وظيفة..

ومافي اهمية بالوظيفة من الناحية التعليمية

لا بالعكس من الناحية المادية واللي عندو واسطة بيتوظف

يا اما بواسطة يا اما برشوة...

وهاد غير خربان لبيوت...وغير القاضي والحاكم بيحكم بظلم مقابل مبلغ مادي...


وانا بعتبرها من وجهة نظري اكبر مشكلة بسورياااا

الواسطة والرشوة...

ولحد اليوم مالها حل وموجودة وبتتفاقم بشكل مو طبيعي بجميع المحافظات وجميع الدوائر الحكومية...وهاد انو منتشرة باكتر الدول العربية...

يا اخي بدك تعزر لموظف اللي راتبو مابزيد عن 15 الف بالشهر ... ويلو ويلو بدو يكفيه لشو ولشو..؟

ولا بدك تعزر الراشي اي المواطن اللي مابمشي غير لا يدفع...وهل مواطن المنتوف ...

نحنا بدنا نعزر حالنا ولا نعزرهم...ولا مين بدو يعزرنا ... شو موقفنا بالدين و بدينا وبدنيتنا وين حكمنااا...

الحق على المواطن ... او على الموظف... او على مين...

الجهل والتخلف بهل عادة عادة الرشوة اللي عم تتفاقم

لك اخي صار المواطن قبل مايقدم الطلب او بدي شي يجهز الرشوه

بدون مايعرف ازا الموظف اللي راح يمشيلو معاملتو بدو يرتشي او لأ

يعني صارت الشغلة بالفطره والبديهة بدون مانحس ع حالنا لما نكون عند موظف نجهز المبلغ قبل المعاملة

من اتفه الحالات اللي صارت معي...وهي حاله من الحالات ... مابتزكر اني فتت مركز حكومي الا مادفعت فيه هداك المبلغ...

انا بسوريا بدي جدد جواز السفر عطيت لموظف جواز السفر لا جدوو

قلي بالحرف الواحد:

ليك اخي انت بدك ياه اليوم ولا بدك ترجع تاخدو بعد اسبوع

قلتلو ايدي بزنارك لا اليوم اكيد بدي ياه

قلي طيب حبيبي هون جنب المركز الحكومي في بياع فلافل وانا بعدني بلا فطور وخلصت دخان

روح جيبلي 3 سندويشات فلافل و 3 كولا و 3 باكيتات دخان مارلبورو الي وللشباب...

وبترجع بتلاقي جوازك خالص

قلتلو من عيوني مو تكرم لك غالي والطلب رخيص

رحت جبتلو طلبو واخدت جواز السفر وضليت ماشي وخلصت معاملاتي...

اتحفونا بقصصكم اول شي لا نتشرف بحاضر دولتنا والموظفين عنا...

وشو رئيكم بالموضوع بشكل عام...

وشو الاسباب اللي عم تخلي هل ظاهرة تنتشر..المواطن .. الحكومة...المادية...

وشو وضع الدين بهل حاله...دين بحرم الرشوه وموظف ابن حلال بلطعك اقل شي اسبوع لا تخلص معاملتك...

مكافحة حالة هل فساد ..الرشوة..كيف ؟؟...وليه؟؟

اما اخيرا وليس اخراَ

ماالفرق بين الرشوة و الواسطة...وشو رئيك..الواسطة اقل من الرشوة ... او فساد لا يقل عن فساد الرشوة...في مجتمعنا الكريم...!؟

وهي مشكلة من المشاكل اللي مابتنحل بمجتمعنا ولا ببلدنا ولا حتى بمدينتنااا لك ولا حتى بضيعتنا...لك ولا حتى بحارتنا...لك اخبط راسي بحيط بيتنا وارتاح بلاخر...!

واخيرا اسف ازا بكون بهل موضوع بقطع رزء الموظفين معنا هههههه

متل عمي اسمر الله يخليلنا ياه موظفنا الشهم مع خالص تحياتي لا اسمر...

اسف ع طول الموضوع بس المشكلة هل موضوع حدث ولا حرج...